स्थानीय तहका कर्मचारीहरु संघर्षतर्फ अग्रसर !
सरकारले संघीय निजामती सेवा विधेयकलाई मन्त्रिपरिषद् बाट पारित गरेर संसदमा दर्ता गर्ने तयारी तिव्र भएको बेला स्थानीय तहमा कार्यरत कर्मचारीहरुले आफ्नो सरोकार नसमेटिएको भन्दै देशव्यापी विरोध प्रदर्शन शुरु गरेका छन् । २०८० भाद्र ५ गते संघिय मामिला तथा सामान्य प्रशासन मन्त्रालयले देशभरको स्थनीय तहलाई भाद्र २२ गतेको निजमती सेवा दिवस मनाउन पत्राचार गरेको सन्दर्भमा स्थानीय तहमा कार्यरत कर्मचारीहरुले संगठित रुपमा आ-आफ्नो स्थानीय तहबाट विज्ञप्ती जारी गर्दै संघीय सरकारको ध्यानाकर्षण गराउने अभियान शुरु गरेका छन् । यसै क्रममा मंगलबार साँझसम्म ७ वटै प्रदेशका १०० भन्दा बढि स्थानीय तहमा कार्यरत कर्मचारीहरुबाट सार्वजनिक भएको विज्ञप्तीमा मूख्यत: निम्नानुसारको माग समेटिएको पाइएको छ ।
मूख्य मागहरु
१)संघीय निजामती सेवा ऐनको सट्टामा एकीकृत निजामती सेवा ऐन जारी गरिनुपर्ने ।
२)अन्तर प्रदेश सरुवाको व्यवस्था संघिय ऐनमा नै खुलाउनुपर्ने ।
३)प्रमूख प्रशासकीय अधिकृतको पद स्थानीय सेवाको हुनुपर्ने ।
४)निजामती अस्पतालमा सबै तहको कर्मचारीलाई समेट्नुपर्ने ।
५)सरुवा प्रणाली चक्रिय, अनुमानयोग्य र व्यवस्थित हुनुपर्ने ।
६)स्थानीय तहका कर्मचारीलाई निजामती सेवाभित्र समेटिनुपर्ने ।
७)सबै तहका कर्मचारीलाई समान प्रकारको वृत्ति विकासको अवसर उपलब्ध गराउनुपर्ने ।
८)निजामती सेवा प्रवेशको द्धार स्थानीय तह हुनुपर्ने ।
९) स्थानीय तहमा कार्यरत कर्मचारीको सुरक्षाको प्रत्याभूति गर्नुपर्ने ।
१०)काजमा रहेका कर्मचारीलाई दरबन्दी सहित सरुवा गर्नुपर्ने ।
राम्रोपालिका टिमलाई प्राप्त सुचना अनुसार आगामी २२ गते मनाउने गरी तय भएको निजामती सेवा दिवसको दिन देशैभरको स्थानीय तहमा कार्यरत कर्मचारीहरुले हातमा कालोपट्टी बाँधेर प्रदर्शन गर्नेछन् । साथै, कर्मचारीहरुको हकहितको लागि प्रतिनिधिसभा तथा राष्ट्रियसभाको माननीय सांसदहरु तथा संसदीय समितिका सदस्यहरु समेतलाई भेटेर आफ्नो आवाज समेत सुनाउने तयारी भएको छ ।कर्मचारीहरुले सार्वजनिक गरेको विज्ञप्तीलाई सम्बन्धित स्थानीयतहले संघीय मामिला तथा समान्य प्रशासन मन्त्रालयमा आवश्यक कार्यको लागि भन्दै फरवार्ड गरेपछि मन्त्रालयमा समेत दवाव सृजना भएको बुझिएको छ ।
https://www.facebook.com/profile.php?id=100083503749049
प्रतिक्रिया (0)