Ramropalika

काठमाडौँ । जिल्ला प्रशासन कार्यालय काठमाडौँले सेवा प्रवाहलाई सरल बनाउन पब्लिक अनाउन्समेन्ट सिस्टम ल्याउन लागेको छ । जेनजी प्रदर्शनपछि सुशासनको माग बढेपछि त्यसलाई सम्बोधन गर्न सार्वजनिक घोषणा प्रणाली (पब्लिक अनाउन्समेन्ट सिस्टम)बाट सेवा दिन लागिएको काठमाडौँका प्रजीअ ईश्वर राज पौडेलले रातोपाटीलाई बताए ।

सेवा प्रवाहलाई नेपालकै मोडल कार्यालयको रुपमा विकाश गर्नेगरी जिल्ला प्रशासन कार्यालय काठमाडौँले पब्लिक अनाउन्समेन्ट सिस्टम (पास)को अवधारणमा सेवा दिन लागेको हो । सुचना प्रविधिको उच्चतम प्रयोग र टोकन प्रणालीबाट सर्वसाधारणलाई सेवा दिनेगरी जिल्ला प्रशासन कार्यालयले प्रणालीको विकाश गरिरहेको छ ।

अर्को हप्ताबाट सेवा सुचारु गर्नेगरी अहिले डिजीटल ट्रान्सफर्मेसनको काम अन्तिम चरणमा पुगेको प्रमुख जिल्ला अधिकारी पौडेलले जानकारी दिए । जिल्ला प्रशासन कार्यालयले आधुनिक शैलीबाट सेवा दिनेगरी विकाश गरेको प्रविधिको शिक्षा, विज्ञान तथा प्रविधिमन्त्री महावीर पुनले सोमबार निरीक्षण गरेका छन् । काठमाडौँ जिल्ला प्रशासन कार्यालयले सुशासनको लागी नयाँ सिस्टम सुचारु गर्न लागेको शिक्षामन्त्री पुनले सामाजिक सञ्जालमार्फत जानकारी दिएका छन् ।

जिल्ला प्रशासनमा जानेहरूलाई बिना झन्झट निश्चित समयमा सेवा दिइने प्रजीअ पौडेलले बताए । उनले भने, ‘त्यसको सुनिश्चितता जिल्ला प्रशासन कार्यालयले गर्नेछ ।’

जेजनी प्रदर्शन हुँदा भदौ २४ मा उच्छृङ्खल समूहले आगजनी गरेको बबरमहल स्थित जिल्ला प्रशासन कार्यालयमा सेवाग्राही प्रतीक्षा तथा सहायता कक्ष स्थापना गरिएको छ । सहायता कक्षमा सेवाग्राहीलाई सहयोग गर्नेगरी कर्मचारी बस्नेछन् ।

सेवाग्राहीको कागजत स्क्रिनिङ्ग गरेपछि कर्मचारीले डिटीजल प्रणालीबाट टोकन दिनेछन् । टोकन पाएका सेवाग्राहीलाई प्रशासनका कर्मचारीले भन्नेछन्, ‘तपाईको काम यत्ति समय भित्र सकिन्छ ।’

त्यसपछि सनाखत गर्नेबेलामा मात्रै प्रतीक्षालयबाट सेवाग्राहीलाई कर्मचारीले स्कर्ट गरेर भित्र लैजाने र सेवा दिएर पठाउने प्रणाली विकाश गरिएको प्रजिअ पौडेलले बताए । उनले भने, ‘नमुना सेवा प्रणालीको सुरुवात अर्को साताबाट हुनेछ ।’ 

यसअघि २०७९ मा जिल्ला प्रशासन कार्यालय काठमाडौँले ‘टाइम कार्ड’ लागु गरेको थियो । तत्कालीन उप–प्रधान एवं गृहमन्त्री रबि लामिछानेको निर्देशनमा त्यसबेला १० प्रकारका सेवामा टाइमकार्ड लागु गरिएको थियो । टाइम कार्ड लागु गर्दा काठमाडौँका प्रजीअ घनश्याम उपाध्याय थिए ।

कुन सेवालाई कत्ति सयमभित्र दिइसक्ने भनेर कागजातका आधारमा ‘टाइम कार्ड’ लागु गरिएको थियो । कागजात पुगेको वा नपुगेको चेक गरेर टाइमकार्ड दिने प्रणाली जेनजी आन्दोलनपछि प्रभावित बनेको थियो । कागजात पुगेको अवस्थामा सेवा ग्राहिलाई ३० मिनेटमा सेवा दिनेगरी टाइम कार्ड लागु गरिएको थियो ।

आवश्यक कागजात पुगेको अवस्थामा १ घण्टाभित्र सेवाग्राहीले नागरिकता पाउने अवस्था थियो । नावालकको प्रमाणपत्र १ घण्टामा र छापिएर आएको राष्ट्रिय परिचयपत्र ३० मिनेटमा पाउन सकिने प्रणाली यसअघि पनि लागु गरिएको थियो ।

काठमाडौँ जिल्ला प्रशासनमा सिफारिस सम्बन्धी काम १ घण्टाभित्र र मुद्दाको पेशी र तारेख ३० मिनेट भिन सक्ने निति लागु गरिएको थियो । त्यस्तै, प्रमुख जिल्ला अधिकारीले हेर्ने मुद्दा ६० दिनभित्र फैसला गर्ने लक्ष्य राखेर काठमाडौँ जिल्ला प्रशासनले आफ्नो सेवामा परिमार्जन गरेको थियो ।