न्यूयोर्क टाइम्सको घुम्नैपर्ने गन्तव्य सूचीको शीर्ष १० मा पर्यो लुम्बिनी
न्यूयोर्क टाइम्सको २०२५ का शीर्ष १० घुम्नैपर्ने गन्तव्य सूचीमा लुम्बिनी, नेपालको ऐतिहासिक गर्व
काठमाडौं। न्यूयोर्क टाइम्सले सन् २०२५ का लागि सार्वजनिक गरेको ५२ गन्तव्यहरूको सूची मा नेपालको ऐतिहासिक तथा धार्मिक स्थल लुम्बिनीलाई नवौँ स्थानमा राखेको छ। लुम्बिनी, भगवान् गौतम बुद्धको जन्मस्थल, यसअघि पनि बौद्ध धर्मावलम्बी र शान्तिप्रेमी पर्यटकहरूको प्रमुख आकर्षणको केन्द्र रहँदै आएको थियो।
लुम्बिनीलाई यस सूचीमा राखिएकोमा लुम्बिनी विकास कोषका सदस्य सचिव सानुराजा शाक्यले गौरव व्यक्त गर्दै यो नेपालको लागि ठूलो उपलब्धि भएको बताएका छन्। “नेपालले पैसा खर्च गरेर पनि गर्न नसक्ने प्रचारप्रसार यो सूचीले सम्भव गराएको छ। यो अवसरलाई जोगाइराख्न र लुम्बिनीलाई अझ व्यवस्थित बनाउँदै पर्यटकहरूको संख्या बढाउन सबैले योगदान दिनुपर्छ,” उनले भने।
पर्यटनमा सकारात्मक प्रभावको अपेक्षा
लुम्बिनी विकास कोषका अनुसार, सन् २०२४ मा मात्रै ११ लाखभन्दा बढी पर्यटकले लुम्बिनी भ्रमण गरेका थिए। न्यूयोर्क टाइम्सको सूचीमा समावेश भएपछि यो संख्या झनै बढ्ने विश्वास गरिएको छ। कोषले विशेषगरी बौद्ध धर्मावलम्बी भएका देशहरू मात्र नभई विश्वभरका पर्यटकहरूको आकर्षण बढ्ने अनुमान गरेको छ।
लुम्बिनीको महत्व र विश्वसम्पदा सूची
लुम्बिनीले युनेस्कोको विश्वसम्पदा सूची मा आफ्नो नाम लेखाइसकेको छ। यसले धार्मिक, ऐतिहासिक र सांस्कृतिक दृष्टिकोणबाट नेपाललाई विश्वभर चिनाएको छ। शान्त वातावरण, ऐतिहासिक स्तूप, बगैंचा, र बौद्ध धर्मका महत्वपूर्ण संरचनाले लुम्बिनीलाई विशेष बनाउँछ।
पर्यटन व्यवसायीहरूले न्यूयोर्क टाइम्सको यस सूचीकृत कार्यले बाह्य तथा आन्तरिक पर्यटनलाई अझ उचाइमा पुर्याउने विश्वास व्यक्त गरेका छन्। लुम्बिनीको प्रचारले नेपाललाई दक्षिण एसियाली पर्यटनको आकर्षक गन्तव्यको रूपमा अझ मजबुत बनाउनेछ।
विश्वभरबाट पर्यटन प्रवर्द्धनमा योगदान
न्यूयोर्क टाइम्सले लुम्बिनीको ऐतिहासिक र आध्यात्मिक महत्त्वलाई विशेष स्थान दिएर बुद्धको जन्मस्थलका रूपमा चर्चा गरेको छ। बुद्ध जन्मिएको स्थलमा रहेको मायादेवी मन्दिर, अशोक स्तम्भ, पवित्र पोखरी र अन्य बौद्ध स्मारकहरूले यो क्षेत्रलाई विश्वभरका पर्यटकहरूको लागि पवित्र स्थल बनाएको छ।
यसले नेपाललाई विश्व पर्यटनको नक्सामा अझ मजबुत बनाउन सहयोग पुर्याउने अपेक्षा गरिएको छ।
Source: – https://www.nytimes.com/interactive/2025/travel/places-to-travel-destinations-2025.html
प्रतिक्रिया (0)